Ilang lugar sa Sarangani isinailalim sa lockdown
MANILA, Philippines — Inilagay ng lokal na pamahalaan sa pinakamahigipit na community quarantine ang mga bahagi ng dalawang coastal barangay sa Maasim, Sarangani Province.
Ayon kay Maasim Mayor Zyrex Pacquiao, layon nito na mapalawak ang contact tracing sa lugar. Kasunod ito ng pagpositibo sa COVID-19 ng isang 52-anyos na babaeng overseas Filipino worker sa Barangay Colon na unang kaso sa nasabing bayan.
Ipinahayag ng alkalde na ang Sitio Bo. Site sa Colon ay inilagay sa enhanced community quarantine (ECQ) matapos matukoy bilang critical area sa COVID-19. Ibig sabihin nito ay walang maaaring lumabas sa nasabing lugar hangga’t hindi pa nasisiguro na ligtas ito sa virus.
Ang Purok 4B sa Brgy. Colon pa rin at Sitio San Roque sa Brgy. Malbang ay idineklara bilang containment zones at inilagay sa modified ECQ. Nasa general community quarantine (GCQ) naman ang Sitio Colon Proper sa Brgy. Colon at Malipayon sa Brgy. Malbang.
Ayon kay Pacquiao, para matiyak na nasusunod ang mga quarantine protocols, naglagay ang LGU ng mga checkpoint sa nasabing mga lugar. May mahigit 30 katao na ang kanilang na-traced na close contact sa pasyenteng dumating noong Hunyo 21. Nilabag umano kasi ng mga kaanak ang protocol nang bisitahin ng mga ito ang naka-isolate na COVID-19 patient.
- Latest
