Negosyante utas sa ambush

NORTH COTABATO, Philippines — Agad na nasawi ang isang negos­yante matapos na tambangan at pagbabarilin sa Barangay Pandan, South Upi, Maguindanao, iniulat kahapon.

Nakilala ang biktima na si Efren Saydoquis, 51-anyos, may asawa, buy and sale trader at taga-Sitio Bolo ng nabanggit na barangay.

Sa report, pauwi na sana ang biktima mula sa kanyang sakahan sakay ng minamanehong multicab nang tambangan at ratratin ng mga hindi pa nakikilalang armadong lalaki gamit ang M-16 armalite rifles.

Nagtamo ng maraming mga tama ng bala si Saydoquis sa iba’t ibang parte ng kanyang katawan na dahilan ng kanyang agarang kamatayan.

Alitan sa lupa ang tinitingnang motibo ng mga otoridad sa pagbaril at pagpatay sa biktima.