Mag-ina mula Hong Kong, negatibo sa nCoV
Matapos ma-quarantine ng 7-araw
BAYOMBONG, Nueva Vizcaya, Philippines — Bahagyang napawi ang pangamba ng mga residente sa lalawigang ito matapos na mag-negatibo sa 2019 novel coronavirus (nCoV) ang mag-ina na umuwi rito mula sa Hong Kong kung saan sila nagbakasyon.
Ayon kay Dr. Napoleon Obana, medical chief ng Region II Trauma and Medical Center sa bayang ito, ang ina at 10-anyos na anak ay tumagal ng halos pitong araw sa isolation room ng ospital simula noong Enero 27 matapos makitaan ng mga sintomas ng bagong virus tulad ng pagsusuka, lagnat at ubo.
Ayon kay Obana, lumabas sa pagsusuri na isinagawa ng Research Institute for Tropical Medicine (RITM) na negatibo sa coronavirus ang mag-ina, batay na rin sa kopya ng test results na natanggap ng ospital kamakalawa ng gabi.
“The mother and daughter were tested negative for novel coronavirus (2019nCoV). They are now out of the isolation room and ready to be discharged,” pahayag ni Obana.
Samantala, patuloy namang inoobserbahan ang isa pang pasyente na babaeng Overseas Filipino Worker (OFW) na nagmula sa Singapore na naka-quarantine sa nasabing ospital matapos makitaan ng parehong sintomas ng nCov. Siya ay sumasailalim sa medical investigation at binabantayan ngayon sa isolation room ng ospital matapos na ma-admit nitong Sabado, Pebrero 1.
“We are urging residents to remain vigilant and not to be frightened, all hospitals are closely monitoring patients who suffer symptoms associated with Wuhan virus especially those who came from China and other countries with nCoV cases,” dagdag ni Obana.
- Latest
