Cargo truck vs FX: 6 patay, 3 grabe
MANILA, Philippines — Anim katao kabilang ang tatlong miyembro ng isang pamilya ang nasawi habang tatlo pa ang malubhang nasugatan makaraang aksidenteng magbangaan ang isang pampasaherong Tamaraw FX at kasalubong na cargo truck sa kahabaan ng Maharlika Highway, Gumaca, Quezon nitong Sabado ng umaga.
Kinilala ang mga nasawi na sina Jimmy Bron, 42; misis nitong si Razel, anak na si JM Bron, at Emmanuel Juel Sagrit; pawang dead-on-the-spot sa insidente samantalang dead-on-arrival sa Gumaca District Hospital si Franciso Joel Butardo at nasawi habang nilalapatan ng lunas si Ulpiano Clores.
Ginagamot naman sa ospital ang mga nasugatan na sina Fatima Jade Butardo, Eda Butardo at Fritchie Joyce Butardo; pawang mga pasahero ng Tamarax FX (WTB 323).
Sa report ng Quezon Police, bandang alas-5:45 ng umaga kasalukuyang minamaho ni Jimmy Bron ang Tamaraw FX sakay ang 8 katao kabilang ang mag-ina nang makabanggaan ang kasalubong na cargo truck (070109) na minamaneho ni Gerome Villar na patungong Manila.
Lumalabas sa imbestigasyon na nakaidlip ang driver ng FX kung saan nagpagewang-gewang ang takbo nito hanggang sa sumalpok sa cargo truck.
Sa lakas ng pagkakabangga, nagtamo ng malulubhang pinsala sa katawan ang mga biktima na agarang ikinasawi ng lima sa kanila.
- Latest
