Konsehal sa Pangasinan itinumba
SAN JACINTO, Pangasinan, Philippines — Isang konsehal ng bayang ito ang nasawi makaraang barilin ng hindi pa nakikilalang suspek kamaka-lawa ng gabi.
Sa ulat ng Pangasinan Police Provincial Office, kinilala ang biktimang si Virgilio Calizo, Jr., 42-anyos, kasalukuyang municipal councilor ng San Jacinto at residente ng Barangay Guibel.
Base sa paunang pagsisiyasat, ang biktima kasama ang maybahay nitong si Grace Calizo habang sakay ng kanilang L300 van nang huminto sila malapit sa isang sari-sari store sa Brgy. Imelda.
Bumaba si Grace upang bumili ng bottled water sa kalapit na tindahan habang hinihintay nila ang isang kliyente sa kanilang negosyong catering. Habang nasa loob ng kanilang sasakyan ang konsehal, biglang sumulpot ang ‘di kilalang lalaki saka siya tinabihan at malapitang binaril sa ulo.
Mabilis na tumakas ang salarin sakay ng motorsiklo matapos ang pamamaril, ayon pa sa ulat.
Isinugod ang biktima sa isang pagamutan sa lungsod ng Dagupan subalit binawian din ng buhay habang nilalapatan ng lunas.
- Latest