P14.3-M marijuana samsam, 6 timbog
MANILA, Philippines — Umiskor ang mga awtoridad kasunod ng pagkakasamsam sa P14.3 milyong halaga ng marijuana na binunot at sinunog sa dalawang magkahiwalay na plantasyon na nagresulta rin sa pagkakaaresto ng anim na katao sa Danao City, Cebu kamakalawa.
Sa report, unang sinalakay ng Danao City Police Station at Philippine Drug Enforcement Agency (PDEA) Central Visayas ang may 500 metro kuwadradong plantasyon ng marijuana sa Brgy. Licos bandang alas-7:30 ng umaga kung saan nakumpiska ang mga puno ng marijuana na aabot sa P4.1 milyon, 4,000 binhi at mga buto nito na nasa P160,000.
Arestado sa operasyon ang suspek na sina Benjie Salde Depositario, 34; Inocentes Juntilla Depositario, 59; Berting Salde Depositario, 27, at Melvin Salde Depositario, 30, na nasamsaman ng isang cal. 45 baril at mga bala.
Sinalakay din ng mga operatiba ang mas malaking plantasyon ng marijuana sa Brgy. Langosig dakong alas-9 ng umaga at nabunot dito ang tinatayang 25,000 malalaking puno ng marijuana na P10 milyon ang halaga. Nasakote rito ang mga suspek na sina Jay Basalo Acidillo at Jhosar Basalo Acidillo, parehong nasa drug watchlist ng pulisya at PDEA Region 7.
- Latest
