Bulacan handa na sa Semana Santa
LUNGSOD NG MALOLOS , Philippines — Dahil sa taunang pagdagsa ng mga turista at motorista sa Bulacan at sa mga kalapit lalawigan, muling ipatutupad ng pamahalaang panlalawigan ng Bulacan ang “Lakbay Alalay (SUMVAC) 2019” ngayong Semana Santa.
Tatlong lugar sa Bulacan ang tatayuan ng first aid stations mula Abril 18-19, 2019 at bukas 24/7 sa Brgy. Kapitangan sa Paombong at National Shrine and Parish of the Divine Mercy sa Brgy. Sta. Rosa I, Marilao habang mula Abril 15-21 naman sa harap ng Gusali ng Kapitolyo mula alas-6:00 ng umaga hanggang alas-6:00 ng gabi.
Sinabi ni Gob. Wilhelmino Sy-Alvarado na layon ng gawaing ito na masigurong ligtas ang mga biyahero at motorista na daraan at papasyal sa lalawigan kung kaya’t inatasan ang mga kawani mula sa Provincial Disaster Risk Reduction and Mangement Office-Bulacan Rescue, PNP, Philippine Army, non-government organizations, mga volunteer na rescue team at katuwang na iba’t ibang C/MDRRMO sa lalawigan na tumao sa nasabing mga istasyon.
“Taun-taon ay sinisikap po natin na siguruhin ang kaligtasan ng mga motorista at turista lalo pa at ang ating lalawigan ay isa sa mga dinarayo sa panahon ng Kuwaresma,” ani Alvarado.
Aniya, sa oras ng pangangailangan o emergency, maaaring tumawag sa emergency hotline na (044)7910566.
- Latest