Obrero pinabulagta sa maisan
LEGAZPI CITY, Albay, Philippines — Tig-isang tama ng bala sa dibdib at ulo ang agad na ikinasawi ng isang 28-anyos na construction worker matapos pagbabarilin sa gitna mismo ng taniman ng mais ng hindi pa nakikilalang gunman habang papasok sa kanyang trabaho sa Zone-1, Brgy.Siba-O, Calabanga, Camarines Sur kamakalawa.
Patay na nang matagpuan ng kanyang mga kaanak at residente ang biktimang si Roger Velasco Castillo, residente ng nasabing barangay.
Sa ulat, dakong alas-12 ng tanghali, nagtaka umano ang bayaw ng biktima na si Roberto Pajavera nang madaanan ang motorsiklo ng huli na nasa tabi ng taniman ng mais. Nang kanyang usisain, laking gulat nito nang makitang nakadapa ang biktima sa gitna ng maisan na duguan at wala nang buhay.
Ayon sa kinakasama ng biktima na si Aileen Panuelos, dakong alas-6 ng umaga nang umalis ang una lulan ng motorsiklo patungong bayan ng Magarao upang pumasok ng trabaho.
Sa imbestigasyon, posibleng inabangan umano ng ‘di kilalang suspek ang pagdaan ng biktima sa nasabing lugar at dinala ito sa gitna ng maisan saka roon pinagbabaril.
- Latest