Selyo para sa ‘Araw ng mga Puso’
MANILA, Philippines — Inilunsad kahapon ng Korporasyong Pankoreo ng Pilipinas o PHLPost ang bagong disenyo ng selyo para sa Araw ng mga Puso o Valentine’s Day.
Ang Araw ng mga Puso ay ipinagdiriwang sa buong mundo tuwing Pebrero 14 ng bawat taon. Kaugnay nito, ginagawa ang mga romantikong gawain katulad ng pagpapadala ng liham at bulaklak sa kanya-kanyang minamahal.
Ang puso, kalapati, at kupido ang ilan lamang sa mga sumisimbolo sa pagdiriwang ng Araw ng mga Puso o Valentine’s Day. Ngayong taon, ang disenyong inihanda ay tinatampok ang “King and Queen of Hearts” sa pambansang kasuotan upang maipakita ang Pilipinong pamamaraan ng selebrasyon sa bansa.
“Ang hari sa disenyo ay ibinibigay ang kanyang puso sa kanyang reyna, habang ang reyna naman ay ibinibigay ang kanyang pangakong pagmamahal sa hari bilang kapalit,” ayon kay Eunice Beatrix Uy Dabu na siyang nagdisenyo ng selyo.
Ang selyong nagtatampok sa Araw ng mga Puso ay maaari nang mabili sa Philatelic counter ng Manila Central Post Office sa Liwasang Bonifacio 1000, Manila at sa mga piling postal areas ng PHLPost.
- Latest
