Rider, angkas durog sa bus!

LEGAZPI CITY, Albay, Philippines — Dalawa katao ang nasawi matapos magbanggaan ang isang motorsiklo at bus sa Maharlika Highway sa Brgy. Mercedez sa Pilar, Sorsogon kamakalawa.

Dead-on-arrival sa pagamutan sina Roberto Llabres, 35, driver ng motorsiklo at angkas na si Arwin Altabano, 35; kapwa ng Brgy. Anislag, Daraga. Arestado naman ang driver ng bus na si Edmund Gura Guam, 46-anyos, ng Brgy. Bago, Bulan, Sorsogon.

Sa ulat, dakong alas-3 ng hapon, mabilis at magkasalubong na binabagtas ng motorsiklo ng mga biktima at ng bus ng St. Martha Bus Lines (TYG-154) ang highway nang biglang okupahin ng bus ang linya ng motorsiklo sanhi upang magbanggaan. Sa lakas ng impact, tumilapon ng malayo ang dalawang magkaangkas na biktima habang halos madurog ang kanilang motorsiklo.

Sinubukan pang isugod ng mga residente sa Vicente Peralta Memorial Hospital ang dalawa pero kapwa sila idineklarang patay.