16-anyos dalagita, patay sa gang war!

MANILA, Philippines — Patay ang isang 16-anyos na dalagita habang nasa kritikal na kondisyon ang dalawa pang kasama nito matapos pagbabarilin ng isa sa limang kabataan na sakay ng motorsiklo dahil sa sinasabing “gang war” kahapon ng madaling araw sa Cebu.

Dead-on-arrival ang biktimang si Alyssa, 16 na nagtamo ng dalawang tama ng bala ng baril sa katawan habang agaw-buhay sa ospital ang mga kasamang sina John Lloyd, 18, na nagtamo ng mga tama ng bala sa kanyang kaliwang dibdib at kaliwang hita, at Nico, 17, na tinamaan ng bala sa likurang bahagi ng katawan.

Sa ulat ng Liloan Municipal Police Station (MPS), naganap ang insidente dakong alas-3 ng madaling araw sa harapan ng isang convenience store sa Barangay Yati, Liloan, Cebu.

Nakatambay sa harap ng convenience store ang ilang mga kabataan kabilang ang mga biktima nang biglang dumating ang mga suspek.

Limang magkakasunod na motorsiklo ang dumaan kung saan isa sa mga suspek na nakasuot ng full-faced helmet ang bumunot ng baril at pinagbabaril ang mga kabataan.

Agad na tumakas ang mga suspek habang dinala naman ang mga biktima sa pinakamalapit na pagamutan kung saan namatay ang dalagita habang ginagamot.

Nakuhanan ng CCTV camera ng convenience store ang pangyayari at sinisiyasat na ng pulisya upang matukoy ang mga suspek.

Isa sa tinitignang motibo ng krimen ay ang “gang war” ng mga kabataan. ­Posible umanong resbak ang nangyari kaya nangangalap na sila ng ebidensiya.