Trader tinodas sa birthday ng ina
LEGAZPI CITY, Albay, Philippines — Nasawi sa mismong birthday ng kanyang nanay ang isang 30-anyos na binatang negosyante matapos na pagbabarilin ng kanyang dating kaalitan dahil sa hinihinalang pagseselos habang nakikipag-inuman ang biktima sa Sitio Bagong-pook, Brgy. GRS, Ragay, Camarines Sur kamakalawa ng gabi.
Hindi na umabot nang buhay sa Ragay District Hospital dahil sa maselang mga tama ng punglo sa katawan ang biktimang kinilalang si Glen Tamayor nang nasabing barangay habang tinutugis na ng pulisya ang suspek na si Geronimo Gamier, 26, may asawa at kapwa residente ng nasabing barangay.
Sa ulat, dakong alas-7:10 ng gabi, habang nag-iinuman at nagkakasayahan ang biktima kasama ang ilang bisita at kamag- anak sa birthday party ng kanyang ina nang dumating ang suspek bitbit ang isang kalibre 45 baril at bigla na lang pinagbabaril sa iba’t ibang bahagi ng katawan ang nasabing negosyante. Nang makitang bumulagta, mabilis na tumakas ang suspek.
Isa sa anggulong tinitingnan ng mga pulis ay ang matagal nang alitan ng biktima at suspek dahil sa umano’y pagseselos na hindi idinetalye.
- Latest