Magkapatid na lider ng sindikato ng droga, 1 pa todas sa shootout
MANILA, Philippines — Patay ang tatlong drug suspect kabilang ang isang magkapatid na hinihinalang lider ng sindikato ng droga matapos na mauwi sa shootout ang buy bust operation sa Brgy. Duljo-Fatima, Cebu City, noong Miyerkules ng gabi .
Kinilala ang mga nasawing suspect na sina Romeo at Joseph Oralde; magkapatid na lider ng sindikato ng droga at isang alyas Ace. Ang magkapatid ay lider ng Oralde drug group na nag-ooperate sa Central Visayas Region.
Ang mga suspek ay pawang nasa drug watch list ng Barangay Anti-Drug Abuse Council (BADAC).
Sa ulat ng Cebu City Police, dakong alas-9:00 ng gabi nang isagawa ng mga tauhan ng Drug Enforcement Group 7 at ng Philippine Drug Enforcement Agency (PDEA) 7 ang buy bust operations sa lugar laban sa mga target ng anti-drug campaign.
Gayunman, agad na pinaputukan ng mga suspek ang mga operatiba matapos na matunugan na mga awtoridad ang kanilang ka-deal sa transakyon ng droga.
Nagkaroon ng palitan ng putok sa pagitan ng mga awtoridad at ng mga suspek kung saan magkakasunod na duguang bumulagta ang mga target na dinala sa ospital, pero idineklarang dead on arrival.
Nakumpiska mula sa bangkay ng mga suspek ang 400 gramo ng shabu na tinatayang nagkakahalaga ng P5.9 M.
- Latest