Mister niratrat sa harap ng kinakasama

LEGAZPI CITY, Albay, Philippines — Duguang bumulagta sa harap mismo ng kanyang live-in partner ang isang 50-anyos na lalaki matapos na pasukin at pagbabarilin sa loob ng kanilang bahay sa Brgy. Baya, Ragay, Camarines Sur kamakalawa ng gabi.

Namatay noon din dahil sa tama ng mga bala sa katawan ang biktimang si Segundo Gayacao.

Sa ulat sa Camp Gen. Simeon Ola, dakong alas-7:30 ng gabi habang nagpapahinga na sa loob ng kanilang bahay si Gayacao kasama ang kanyang kinakasamang si Elvie Mora nang tatlong gunmen ang puwersahang pumasok at tinutukan ng baril ang biktima.

Nagtangkang manlaban ang biktima pero singawan siya ng isa sa mga gunmen na huwag nang lumaban at saka siya sunud-sunod na pinaputukan.

Tumakas ang mga suspek na naglakad lang palayo. Pitong basyo ng kalibre .45 pistol ang nakuha sa lugar.