2 bike vs kuliglig: 1 dedo, 4 kritikal

TUGUEGARAO CITY,  Cagayan, Philippines – Patay ang 14-anyos na binatilyo habang kritikal naman ang apat matapos salpukin ng dalawang motorsiklo ang nakaparadang traktorang kuliglig sa tabi ng kalsada sa Barangay Toran, bayan ng Aparri, Cagayan kahapon ng madaling araw. Kinilala ni SPO1 Florentino Usita Jr. ang namatay na si Steve Jones Campo habang isinugod sa pagamutan sina Francis Rey Arribbay, 21; Kenneth Villamor, 16; Ian James Calata, 16; at si Roderick Calata, 14, mga residente ng Barangay Macanaya. Sinasabing nagkakarera ang dalawang motorsiklo para humabol sa inuman nang unang salpukin ni Arribbay ang nakaparadang kuliglig kasunod si Calata. Sa lakas ng salpok ay nagsitilapon sa ere bago nagpagulung-gulong ang mga biktima. Idineklarang patay sa Toran District Hospital si Campo na kaangkas ni Arribay na inilipat naman sa Cagayan Valley Medical Center kasama si Villamor.