LBC pinasok: Holdaper utas sa shootout
MANILA, Philippines - Napaslang ang isa sa pitong holdaper na responsable sa panloloob sa LBC money remittance center matapos na kumasa sa tumugis na mga operatiba ng pulisya sa Brgy. San Cristobal, Calamba City, Laguna nitong Huwebes ng gabi. Kinilala ni Laguna Provincial Police Office (PPO) Director P/Supt. Joel Pernito ang napatay na si Jonathan Domingo alyas Pulo Maligno, miyembro ng notoryus na robbery/holdup gang. Nauna rito, hinoldap umano ng mga suspek ang isang sangay ng LBC sa Brgy. Banlic, Cabuyao, pasado alas-2 ng hapon. Walang nagawa ang mga tellers at guwardya ng LBC matapos na tutukan ng baril ng mga holdaper at tinangay sa P20,000 cash saka nagsitakas sa hiwa-hiwalay ng direksyon. Sa hot pursuit operations ng Calamba City Police at Cabuyao Police sa pangunguna ni C/Insp. Leopoldo Ferrer, napatay si Domingo nang lumaban umano matapos salakayin ang kanyang pinagtataguan sa Brgy. Cristobal, Calamba City dakong alas-10 ng gabi.
- Latest