Nene pisak sa truck

MANILA, Philippines - Patay ang 10-anyos na nene habang lima naman ang malubhang nasugatan makaraang magulungan ng truck sa naganap na banggaan ng dalawang motorsiklo sa kahabaan ng national highway sa Barangay Poblacion, bayan ng Tubod, Surigao del Norte kamakalawa ng gabi. Halos nagkalasug-lasog ang katawan ni Kristel Ann Dumas matapos na tumalsik sa motorsiklo at magulungan pa ng truck.

Isinugod naman sa Caraga Regional Hospital ang mga sugatang sina Virgita Dumas, Kristine Jay Dumas, Alan Dumas, Samuel Pullos, at si Alan Dumas. Sa police report na nakarating sa Camp Crame, tumilapon sa motorsiklo ni Samuel ang mga biktima makaraang sumalpok sa kasalubong na motorsiklo naman ni Alan.

Minalas namang magulungan at makaladkad pa ng paparating na truck ang batang babae. Gayon pa man, sa halip na saklolohan ang mga biktima ay tumakas ang driver ng truck.