3 magkakapatid patay sa sunog

TUGUEGARAO CITY, Cagayan, Philippines - Tatlong magkakapatid ang iniulat na namatay matapos na makulong sa nasusunog nilang bahay sa Barangay Polipol, bayan ng San Gabriel, La Union, kamakalawa ng gabi.

Halos hindi na makilala ang mga biktimang sina Mae Joy Gacayan, 7; Sheena Grace Gacayan, 5; at si Meynard Carl Gacayan, 3, pawang nakatira sa nasabing barangay.

Tanging ang 10-anyos na matandang kapatid na si John Mark ang nakaligtas kay kamatayan matapos na makatakbo palabas mula sa nasusunog nilang bahay.

Sa ulat ni P/Senior Insp. Gerardo Soriano, hepe ng San Gabriel PNP, nasa kabayanan pa ang mga magulang ng magkakapatid ng maganap ang sunog na pinaniniwalaang nagmula sa natumbang lampara.


Nabatid na hindi pa nararating ng serbisyo ng kuryente ang nasabing lugar kung saan karamihan sa pamilya dito ay nagtitiis sa lampara pagsapit ng dilim.