CAMARINES NORTE ,Philippines – Nagdulot ng kamalasan ang ‘Biyernes Trese’ matapos na masawi ang apat katao kabilang ang isang buntis na ginang nang pagbabarilin ng isang nag-amok na mataderong lasing na nabahiran ng karahasang piyesta ng patron sa Brgy. Gumamela, Labo, Camarines Norte kahapon ng madaling-araw.
Kinilala ang mga biktima na ang mag-asawang sina Roger Dino, misis nitong si Rosita Dino, 8 buwang buntis; kapwa 38 taong gulang na mga residente sa lugar; Efren Reyes Jr., 29 at Gary Dino kapatid ni Roger ng bayan ng Paracale.
Pinaghahanap naman ang suspek na natukoy lamang sa pangalang Archie alyas Boy Negro na dumayo lamang sa piyesta ng Patron ng Mahal na Ina na ginanap sa Sitio Doongan, Purok 3, Brgy. Gumamela ng nasabing bayan
Sa ulat ng tanggapan ni Camarines Norte Provincial Police Office (PPO) Director Sr. Supt. Joselito Esquivel Jr., naganap ang nasabing pamamaril bandang alas-3:20 ng madaling- araw sa naturang lugar.
Lumilitaw sa imbestigasyon, na ayaw umanong magbayad ng suspek ng inorder nitong jumbo na Ginebra San Miguel sa sari-sari store ng mag-asawang Dino at ng sinisingil ito ng buntis na ginang ay napikon na agad niratrat ang mga ito na kapwa dead-on-the-spot sa insidente. Ang dalawa pang biktima ay binawian naman ng buhay sa Camarines Norte Provincial Hospital.
Nasaksihan mismo ng panganay na anak ng mag-asawa na si Rosejean, 16-anyos ang ginawang pamamaril sa kanyang mga magulang ng suspek. Isinasailalim pa sa imbestigasyon ang kasong ito.