QUEZON, Philippines - Tinapos na ng isang battered wife ang kanyang paghihirap sa kamay ng sariling mister matapos nitong pagsasaksakin hanggang sa mapatay habang nasa kainitan ng kanilang pagtatalo, kamakalawa ng gabi sa Barangay Sisi sa bayan ng Guinyangan, Quezon.
Nagtamo ng mga saksak sa ibat-ibang bahagi ng katawan si Paulino Javier habang naaresto naman ang suspek na misis na si Yolanda Collado na kapwa nakatira sa nabanggit na barangay.
Sa inisyal na imbestigasyon ng pulisya, nabatid na dakong alas-8 ng gabi ay lango sa alak na umuwi ang biktima kung saan agad na inumbag ang kanyang misis.
Dala ng matinding pagkaawa sa sarili na kalimitang pinagbubuhatan ng kamay ng asawa ay nagtungo ang suspek sa kusina.
Nang bumalik ang misis na may hawak na patalim ay sunud-sunod na inundayan ng saksak ang kanyang mister na animo’y manok na nagkikisay at duguang bumulagta.