MANILA, Philippines - Patay ang driver habang pito pa ang nasugatan makaraang aksidenteng bumangga sa isang malaking punongkahoy sa tabi ng highway ang sinasakyan ng mga itong truck sa Baguio City nitong Huwebes ng gabi.
Kinilala ang nasawing biktima na si Alfred Langpawen, 28 anyos, driver ng Isuzu Ford truck (AYF-384), idineklarang dead on arrival sa Baguio City General Hospital and Medical Center.
Ang mga nasugatang biktima ay nakilala namang sina Allan Bacayan, Renato Lawingan, Victor at Joker Cawideng, Cyril Nacatab, Jhon Kayachen at ang may-ari ng behikulo na si Cyril Fomeg-as; pawang nilalapatan na ng lunas sa nasabing pagamutan.
Sa ulat ng Baguio City Police, bandang alas-11 ng gabi kasalukuyang bumabagtas sa lugar ang truck na minamaneho ni Langpawen ng mawalan ito ng kontrol sa manibela at sumalpok sa isang pine tree na nasa tabi ng highway na sa kamalasan ay sinuyod pa ang isang nakaparadang KIA pride (UBG-421) sa lugar.
Lumilitaw pa sa imbestigasyon na nasa impluwensya ng alak si Langpawen ng magmaneho ito na humantong sa malagim na trahedya.