BULACAN, Philippines – Aabot sa P130 milyong halaga ng asukal na pinaniniwalaang naipuslit sa bansa mula sa Thailand ang nasamsam ng mga awtoridad makaraang salakayin ang malaking bodega sa Barangay Libtong sa Meycauayan City, Bulacan kahapon ng umaga.
Sa police report na natanggap ni P/Senior Supt. Fernando Mendez Jr., lumilitaw na nakipag-ugnayan kay P/Supt. Eric Noble ang mga tauhan ng Bureau of Customs upang salakayin ang malaking bodega sa Sterling Industrial Park Subd. kung saan nakaimbak ang 300,000 sakong asukal na sinasabing naipuslit sa bansa mula sa Thailand.
Nabatid na naghintay pa ng ilang oras ang mga awtoridad sa pagsulpot ng may-ari ng bodega ngunit hindi ito nagpakita kaya napilitan ang mga tauhan ni P/Insp. June Tabigo-on at ilang tauhan ng Bureau of Customs Intelligence and Investigation Services na pasukin ang naturang bodega.