Pagawaan ng paputok sumabog

BULACAN, Philippines – Isa ang nasawi habang tatlong iba pa ang nasugatan makaraang sumabog ang pagawaan ng paputok sa Barangay Sto. Niño sa bayan ng Baliwag, Bulacan kamakalawa ng gabi. Napuruhan sa pagsabog si Antonio Santos, 44, habang nagtamo naman ng 2nd degree burn sina Rudy Mapalad 27; Rodel Marcelo, 25; at si Alvin Dela Cruz, 27, pawang nakatira sa Purok 6 sa nabanggit na barangay. Lumilitaw sa imbestigasyon na magkakasamang gumagawa ng paputok ang mga biktima sa bodega na pag-aari ni Arnaldo Dela Cruz nang maganap ang pagsabog. Kinasuhan naman ng pulisya ang may-ari ng bodega dahil walang kaukulang permiso sa kinauukulang ahensya ng lokal na pamahalaan para gumawa ng mga paputok.