CABANATUAN CITY, Philippines — Kalaboso ang binagsakan ng dalawang armadong lalaki na bumaril sa sales agent ng softdrink makaraang maaresto ng mga awtoridad sa isinagawang follow-up operation sa Barangay Mabini, sa bayan ng Llanera, Nueva Ecija, kamakalawa ng umaga. Pormal na kinasuhan ang mga suspek na sina Dennis Vilelia, 30, ng Barangay Puting Tubing, Gapan City; at Rafael Merez, 25, ng Barangay San Juan, Aliaga, Nueva Ecija. Nasa ospital naman ang nabaril sa hita na si Bernardo Martin, 51, ng Barangay San Ricardo, Talavera, Nueva Ecija. Lumilitaw na nakarinig ng putok ng baril ang pulisya na nagpapatrolya sa nabanggit na lugar kung saan kaagad naman tinungo ang pinagmulan ng putok. Naabutan ng pulisya ang tumatakas na suspek na nakipagpalitan ng putok kung saan maging ang tropa ng 81st Infantry Battalion ng Phil. Army ay rumesponde kaya naaresto ang dalawang suspek.