CAMP SIMEON OLA , Legazpi City, Philippines – Karumal-dumal na kamatayan ang sinapit ng isang 90-anyos na lolo nang hatawin sa ulo ng kanyang apo sa loob ng kanyang bahay sa Sitio Caparos, Barangay Buenavista, Castilla, Sorsogon.
Nakilala ang biktima na si Domingo Certeza, biyudo.
Ang suspek na kaagad kinasuhan ay kinilalang si Alfredo Absoro Jr. nasa hustong gulang at residente ng Sitio Bantique, Barangay Bantayan, Pilar, Sorsogon.
Sinabi ng pulisya na nag-aalmusal si Certeza sa loob ng kanyang bahay bandang alas-7:00 ng umaga nang hatawin siya sa ulo ni Absoro sa pamamagitan ng isang pirasong bakal. Agad na bumulagta ang biktima.
Matapos ang pamamaslang ay agad na tumakas ang suspek.
Hindi pa mabatid ng mga awtoridad habang isinusulat ito kung ano ang motibo ng suspek para paslangin ang kanyang lolo. Ed Casulla