Newsman, pulis pinabulagta

RIZAL, Philippines – Napatay sa anti-drug operation ang isang reporter ng tabloid at isang pulis matapos ratratin ng grupo ng notoryus na drug syndicates sa bisinidad ng Barangay Sta. Ana sa bayan ng Taytay, Rizal kahapon ng madaling-araw.

Naisugod pa sa Manila East Medical Center subalit idineklarang patay sina Tiburcio “Jojo” Trajano, correspondent ng Remate, re­sidente ng Brgy. Sto. Niño, Marikina City at PO1 Virgilio Dela Cruz Jr., 29, ng Pastor Ma­silang Street, Tanay, Rizal.

Kabilang naman sa mga suspek na naaresto ng pu­lisya ay sina Steve Kasan, Noraisa Mohamad-Kasan, Dhats Kensay Abag, Mi­chelle Olitan, kapwa nani­nirahan sa Camp Bagong Diwa, Taguig City; dalawang menor-de-edad na babae na kapwa residente ng Signal Street, Dream Land Subdivision, Taguig City.

Sa ulat ng Region 4A director, P/Chief Supt. Perfecto Palad, alas-2:25 ng madaling-araw nang maga­nap ang insidente sa bisini­dad ng Lupang Arienda sa nabanggit na barangay.

Nabatid na papasok pa lamang ang pangkat ng anti-drug operatives, kasama si Trajano bilang media witness sa hideout ng drug gang leader na alyas Zoren nang umalingawngaw ang sunud-sunod na putok ng baril.

Nabatid na agad na na­pu­ruhan ng bala ng baril si PO1 Dela Cruz sa ulo at dib­dib habang si Trajano na­man sa hita at sikmura.

Samantala, ipinarerebisa na ni PNP Chief Director General Jesus Verzosa, ang polisiya hinggil sa pagsa­sama ng mediamen sa police operations matapos ang insidente.

Sinabi pa ni Verzosa na lubhang nakakalungkot na nasawi sa pagtupad ng kani­yang tungkulin si Trajano kasabay ng pakikiabot ng pakikiramay sa pamilya nito at ni PO1 De la Cruz.

Ayon kay Verzosa ang kaso ni Trajano ay iniutos na niyang ibilang sa imbes­ti­gasyon ng Task Force USIG, ang pangunahing nag-iim­bestiga sa mga kaso ng extrajudicial killing.

Kinondena naman ng pa­munuan ng National Press Club sa pamumuno ni Benny Antiporda, ang pagka­kapa­tay kay Trajano. Danilo Garcia at Joy Cantos