CAMP VICENTE LIM, Laguna, Philippines – Naging trahedya ang pagdiriwang ng Valentine’s Day ng magkasintahan nag-date matapos pagbabarilin hanggang sa mapatay ng mga di- nakilalang lalaki bago iniwan sa madamong bahagi ng industrial park sa Calamba City, Laguna kahapon ng umaga.
Kinilala ni P/Supt. Christopher Tambungan, hepe ng Calamba PNP, ang mga biktimang sina Elson Caguicla, 18, ng Lizardo Compound, Sto. Domingo Road, Barangay Mayapa, Calamba City; at Ronalie Calida, 18, ng Don Bosco Street, Barangay Mayapa, Calamba City.
Sa police report, si Caguicla na estudyante ng Dual Tech at si Calida na estudyante naman ng Letran College ay natagpuang nakahandusay sa madamong bahagi sa may Sitio Riverside, Barangay Batino bandang alas-6 ng umaga.
Sa salaysay ni Calamba City Traffic Management Officer Nardo Barradas, na naunang nakakita sa dalawang bangkay, na kapwa may mga tama ng bala ng baril sa ulo.
Ayon sa pulisya, huling namataang buhay ang magsyota kamakalawa ng bandang alas-7 ng gabi habang nagkukwentuhan at nakaupo sa gutter ng kalsada ng naturang lugar.
Sa kuwento naman ng security guard na si Von Gerald Velarde, na nakatalaga sa gusali na may ilang metro ang layo sa pinangyarihan ng krimen, nakarinig siya ng dalawang magkasunod na putok ng baril kamakalawa ng gabi pero hindi niya ito pinansin.
Isinantabi naman ng mga imbestigador na pagnanakaw ang motibo sa pagpaslang sa magkasintahan dahil hindi naman nawawala ang mga pera at kagamitan ng mga biktima noong sila ay matagpuang patay.