Napaaga ang salubong ni kamatayan laban sa isang sanggol na lalaki makaraang tumirik ang mga mata at magkikisay dahil sa kinaing chocolate stick na sinasabing kontaminado ng melamine na gawa sa China sa Butuan City, Agusan del Norte kamakalawa.
Sa report na tinanggap ni P/Chief Supt. Jaime Milla, na isinumite sa Camp Crame, kinilala ang biktima na si David Hendric Espiritu, pitong buwang gulang at idineklarang patay ng mga tuminging doktor sa Agusan del Norte Provincial Hospital.
Sa pahayag ng ina ng biktima na si Elvie Lyn Espiritu, 44, ng Barangay 3, Purok 16, binigyan niya ng chocolate stick na gawa sa China ang kaniyang anak dakong alas-10 ng umaga.
Gayon pa man, ilang minuto matapos kumain ng chocolate ay biglang nanigas ang biktima matapos dumanas ng kombulsyon saka tumirik pa ang mga mata gayong wala namang karamdaman at masaya pa itong naglalaro bago nakakain ng nasabing produkto ng China.
Dahil dito, ay kaagad na isinugod sa ospital ang biktima subali’t idineklara na itong patay.
Kasalukuyang sinusuri na ng Bureau of Food and Drugs ang nasabing sample ng tsokolate upang tiyakin kung kontaminado ito ng melamine.