12 nalason sa arroz caldo

CAMP CRAME  — Labindalawang estudyante ang iniulat na naospital matapos kumain ng arroz caldo sa pribadong eskuwelahan sa Dadiangas, General Santos City kamakalawa ng umaga. Base sa ulat, ang mga biktima ay pawang estudyante sa elementarya at high school sa Notre Dame of Dadiangas for Girls. Napag-alamang kumain ng arroz caldo ang mga biktima sa canteen ng eskuwelahan at ilang oras ang nakalipas ay nakaranas ng pananakit ng tiyan, pagkahilo at matinding pagsusuka kaya agad na isinugod sa General Santos City Health Office. Lumilitaw sa pagsusuri ni Danny Canencia, sanitary health inspector sa nasabing pagamutan, mismong mga madre pa ng  eskuwelahan ang nagluto ng arroz caldo para sa mga estudyante. Inihayag naman ng eskuwelahan na aksidente lamang ang pangyayari at pinaiimbestigahan na nila ang insidente. Joy Cantos