Shootout: 3 kidnaper tumba

QUEZON —  Bayolen­teng kamatayan ang sinapit ng tatlong kalalakihan na pi­naniniwalaang miyembro ng kidnap-for-ransom gang ma­karaang makipagbarilan sa mga operatiba ng pulisya sa bahagi ng Barangay Bo­co­han sa Lucena City, Que­­zon kahapon ng madaling-araw.

Dalawa sa tatlong na­patay ay sina Marino Hapin Jr. ng Marquez Compound, Putatan, Muntinlupa City; Joe­mar Casabuena de Felipe, lider ng KFR gang na may standing warrant of arrest mula kay Judge Aven­turado ng Branch 2 11th Judicial Region ng Tagum City, Davao sa kasong kid­napping at serious illegal detention.

Sa pahayag ni P/Senior Supt. Hernando Zafra, Que­zon police director, ang tatlo ay dating miyembro ng no­toryus na Parolino kidnap-for-ransom gang na nag-oope­rate sa Southern Tagalog.

Batay sa ulat na tinang­gap ni P/Supt. Marcos Ba­dilla, chief of police sa Lucena City, na nakipag-coordinate ang mga tauhan ng Presidential Anti-Crime Emergency Response (PACER) sa pamumuno ni P/Supt. Ronald Oliver Lee kay Quezon Intelligence Chief P/Chief Laudemir  Bryan Llaneta tungkol sa pre­sensya ng grupo sa Lucena City na posibleng may tinatarget na biktima.

Agad namang tinungo ng mga pulis ang pinagku­kutaan ng mga suspek sa Roadside Inn sa Barangay Bocohan bandang alas-2:25 ng madaling-araw.

Subalit bago pa maka­rating ang mga awtoridad sa nasabing motel, nakatunog na ang mga suspek kaya mabilis na nagsitakas sakay ng isang Nissan Sentra  (PFG 841) at sumibad pa­tungong Purok Uno.

Nagkaroon ng habu­lan hanggang sa makorner ang mga suspek sa nabang­git na barangay bandang alas-3:20 ng madaling-araw na nagresulta ng pagkaka­patay sa tatlong suspek.

“Base sa aming intel­ligence information, naka­handa na naman ang grupo para mangkidnap ng mga kila­lang personalidad sa Quezon,” ani Llaneta sa PSN.

Nakarekober ang mga awtoridad ng isang Ingram Uzi machine pistol at dala­wang caliber .45 pistol mula sa mga napatay na suspek.