Barangay chairman itinumba

CAMP SIMEON OLA, Legazpi City – Pinagtulungang saksakin hanggang sa mapatay ang isang barangay chairman ng magkakapatid na lalaki habang ang biktima ay naglalakad papauwi sa Barangay Ubongan, Baleno, Masbate kamakalawa ng gabi. Duguang iniwan ang biktimang si Salvador Launo, samantalang tinutugis naman ang mga suspek na sina Joseph, Jimaor at Bong bong Rapsing na pawang residente ng Barangay Pulot.

Napag-alaman sa imbestigasyon ng pulisya na katatapos pa lamang magronda ng biktima bandang alas-10 ng gabi at nagpaalam sa kanyang mga kasamahan hanggang sa harangin ng mga suspek. May teorya ang pulisya na matinding galit ang umiral sa mga suspek kaya pinaslang ang biktima. (Ulat ni Ed Casulla)