Bedridden na senior, patay sa sunog

MANILA, Philippines — Isang 79-anyos na babaeng bedridden ang nasawi nang maiwan sa loob ng kanyang bahay na nasusunog sa Barangay Buting, Pasig City, Huwebes ng madaling araw.

Sa inisyal na ulat, na-trap ang biktima sa kanyang silid at bigo siyang mailabas dahil sa kapal ng usok at init sa kabila ng pagsisikap na maisalba siya.

Nabatid na kasama ng biktima ang kanyang pamangkin, at caregiver na may kasamang anak.

Nabatid na isa sa rumesponde ang mismong barangay chairman ng lugar na si Jigs Servillon, pamangkin ng biktima.

Naganap ang sunog dakong ala-1:00 ng madaling araw sa E. Mendoza Street, Purok Aliw na umabot lang sa unang alarma at fire-under control pagsapit ng alas-2:00 at idineklarang fire-out alas 3:15 na kung saan ilang kabahayan ang nadilaan din ng apoy.

Inaalam pa ang sanhi ng sunog at danyos na idinulot sa mga ari-arian.