Alcantara: Co, nakatanggap ng 25% kickback mula sa flood control projects

Nang maging House Speaker si Romualdez…

MANILA, Philippines — Sa pagtestigo nitong Martes ni dating Department of Public Works and Highways Bulacan 1st District Engineer Henry Alcantara sa Sandiganbayan Third Division para sa bail hearing sa kasong plunder case ni Romualdez ay inihayag nito na humihirit ng dagdag na 5 percent na commitment fees para sa infrastructure projects si dating Ako Bicol party-list Representative Zaldy Co matapos mahalal na House Speaker si Romualdez noong 2022.

Anya, mula sa 20 percent na kickback ay nais ni Co na gawin itong 25 percent bago pa man ilatag ang 2023 National Expenditure Program (NEP).

Ayon kay Alcantara, pinagsama-sama niya ang mga kahilingan para sa mga proyekto sa isang “regular wishlist” at isinumite sa DPWH Central Office para maisama sa NEP at sisimulang ibigay ang mga kickback kapag nakapaloob na sa NEP ang mga naturang proyekto.

Inilarawan din ni Alcantara ang hiwalay na wishlist para sa mga proyekto na isinusumite sa bicameral conference committee at ibibigay ang natitirang balanse ng commitment fees kay Co kapag naisama na ang mga proyekto sa General Appropriations Act.

Ayon kay Alcantara, nakadepende sa mga napagkasunduan nina Co at ng mga mambabatas ang anumang ganitong transaksyon.

Ipinaliliwanag nito ang umano’y paghahatid ni Co ng mga maleta na puno ng pera sa mga mambabatas, kabilang si Romualdez ay pamamagitan ng kanyang mga dating bodyguard.

Anya, wala siyang direktang pakikitungo kay Romualdez dahil kina Co at dating DPWH Undersecretary Roberto Bernardo lamang siya nakikipag-ugnayan.