Grade 4 student kritikal sa hataw ng raketa ng amain
MANILA, Philippines — Isang 9-anyos na batang lalaki ang inoobserbahan sa ospital matapos na hatawin ng raketa ng badminton ng lasing na amain, kamakalawa ng gabi sa Brgy. Culiat, Quezon City.
Ang biktima na nagtamo ng mga sugat sa ulo at pasa sa iba’t ibang bahagi ng katawan ay isang Grade 4 student habang ang suspek na amain nito ay nakilalang si Reymark Del Carmen, 29.
Sa ulat, bago, alas-6:00 ng gabi ay nalaman ng suspek na nasa computer shop ang biktima kaya’t inutusan ang mga kalaro ng biktima na tawagin ito.
Sa paglabas ng computer shop ng biktima ay agad na pinaghahataw ng suspek ng badminton racket ang biktima sa ulo at katawan.
Halos nawasak ang raketa at naawat naman ng mga kapitbahay ang suspek habang isinugod sa ospital ang biktima.Lumilitaw na madalas na masaktan ng suspek ang biktima sa tuwing ito ay nalalasing.
Nahaharap ang suspek sa reklamong paglabag sa Republic Act 7610 o Special Protection of Children against Abuse, Exploitation, and Discrimination Act.
- Latest
