MANILA, Philippines — Isang preso at isang jail guard ang kapwa nasawi sa naganap na barilan sa loob ng provincial jail sa Sta. Cruz, Laguna, kahapon ng umaga.
Hindi na umabot ng buhay sa ospital ang biktimang si Jonathan Sombilla Buenviaje, 50, prison jail guard 1, residente ng Brgy. Maulawin, Pagsanjan, Laguna dahil sa tinamong tama ng bala sa katawan.
Habang namatay noon din ang inmate na si Romnick Balbaran Estadilla, 32, residente ng Brgy. Ibabang San Roque, Liliw, Laguna.
Ayon kay P/Col. Harold Depositar, Laguna police director, alas-9:00 ng umaga ay rumesponde ang kanyang mga tauhan nang makatanggap ng tawag na may nagaganap na barilan sa loob ng provincial jail na matatagpuan sa Brgy. Poblacion 1, Santa Cruz, Laguna.
Lumalabas na ang biktimang si Buenviaje ay magdu-duty na bilang jail guard sa Dormitory #1 nang mula sa likuran ay sumulpot si Estadilla at puwersahang kinuha ang kanyang baril at pinagbabaril ito ng maraming beses sa katawan.
Nakita ito ng ilang naka-duty na jail guard at pinutukan si Estadilla na agad na nasawi noon din.Patuloy ang imbestigasyon sa motibo ng krimen.