PNP sa PAGCOR: Listahan ng legit POGO operators isumite
MANILA, Philippines — Upang matuldukan na ang insidente ng kidnapping at ibang criminal activities, dawit ang ilang manggagawa ng Philippine Offshore Gaming Operators (POGO) ay pinasusumite ng Philippine National Police (PNP) sa Philippine Amusement and Gaming Corporation (PAGCOR) ang listahan ng lehitimong operator ng POGO sa bansa.
Ayon kay PNP Chief Gen. Rodolfo Azurin Jr., na ang hiling nila sa PAGCOR ay nakikita nilang istratehiya upang hindi na sila gumugol pa ng mahabang oras sa pag-crackdown sa mga iligal na POGO sa bansa.
Aniya, tuluy-tuloy ang pakikipag-ugnayan ng PNP sa Department of Justice, National Bureau of Investigation, Bureau of Immigration, Chinese Embassy at iba pang ahensya para tutukan ang mga isyu at problema tungkol sa operasyon ng mga POGO.
Sisilipin din aniya ang business permit ng mga POGO at nakikipag-ugnayan din sila sa Bureau of Immigration (BI) upang magkaroon ng records ang mga Chinese na pumupunta sa bansa para magtrabaho.
Kadalasang nangyayari na ang POGO sa bansa ang ginagawang taguan ng mga Chinese na may kaso sa kanilang bansa.
- Latest