Miyembro ng SAF na umawat sa away, napatay
MANILA, Philippines — Isang pulis na miyembro ng Special Action Force (SAF) ang nasawi nang pagtulungang gulpihin ng mga taong inaawat nito sa peryahan sa Brgy. Poblacion, Mapandan, Pangasinan.
Ang biktima na nasawi sa ospital ay kinilalang si Pat. Robert T. De Vera, Jr. 29, may-asawa, residente ng Brgy. Luyan, Pangasinan at PNP-SAF member na nakadestino sa Samar.
Sa ulat, bago naganap ang insidente, ala-1:00 ng madaling araw sa peryahan noong Mayo 25 ay hinihintay ng biktima at kasama nito sa isang kainan ang iba pang mga kaibigan nang mapansin ng una ang nagaganap na komosyon.
Dito, lumapit ang biktima sa nag-aaway at nagpakilalang pulis kaya’t naawat ang kaguluhan.
Subalit, tatlong lalaki umano na taga-peryahan ang lumapit sa biktima at pinagtulungang gulpihin ito hanggang sa mawalan ng malay tao at dinala sa ospital na kung saan idineklara itong dead on arrival.
Nagsasagawa na ng manhunt operation ang mga pulis laban sa tatlong suspek na kinasuhan ng murder.
- Latest