5 notoryus na holdaper dedo sa engkuwentro
MANILA, Philippines — Limang pinaniniwalaang miyembro ng notoryus na robbery-hold-up ang napatay matapos maka-engkwentro ng mga otoridad sa isinagawang operasyon, kamakalawa sa lalawigan ng Kalinga.
Hindi muna pinangalanan ang mga suspek base sa mga nakuhang identification card sa mga ito na pawang mga tubong Pampanga.
Batay sa report ng Tabuk City Police Station, naganap ang insidente hapon ng Huwebes sa Purok 02, Brgy Malalao, Tabuk City, Kalinga.
Ayon kay Police Lt. Colonel Dinulong Tombali, Tabuk City police chief, nakatanggap sila ng report hinggil sa presensya ng grupo na may mga dalang illegal na kargamento sa nabanggit na lugar.
Kaya’t naglatag ng checkpoint ang mga pulis sa posibleng dadaanan ng mga suspek kaya naharang ang kulay gray na kotse, subalit hindi huminto at sa halip ay pinaputukan ang mga pulis.
Gumanti ng putok ang mga pulis at tinamaan ang mga suspek na agad ikinasawi ng dalawa habang ang tatlo ay dinala sa pagamutan, pero namatay din ang mga ito.
Narekober ng mga pulis mula sa mga suspek ang 23 marijuana bricks na nagkakahalaga ng P2.76-milyon na nasa loob ng sasakyan at apat na .45-caliber, cartridges, bullets, holster, at M26 hand grenade.
- Latest