PRC balik-ops na sa COVID-19 testing para sa Philhealth
MANILA, Philippines — Matapos magbayad ng kalahati ng kabuuang utang ang PhilHealth ay balik-operasyon na ang Philippine Red Cross (PRC) ng coronavirus disease (COVID-19) testing para sa Philippine Health Insurance Corporation (PhilHealth).
Sinabi ni PRC Chairman at CEO, Senator Richard Gordon, Martes pa lang ng gabi ay ipinagpatuloy na nila ang COVID-19 testing sa Ninoy Aquino International Airport (NAIA), matapos ianunsiyo ng PhilHealth na nag-release na sila ng kalahating bilyong piso bilang bayad sa PRC.
Inatasan na rin aniya niya ang PRC Secretary-General at lahat ng kanilang laboratoryo sa buong bansa na muli nang magbukas para sa PhilHealth.
Tiniyak rin ni Gordon na magsasagawa kaagad ng regular full testing simula nitong Miyerkules.
Hinihiling rin ni Gordon sa PhilHealth na bayaran agad ang natitira pang balanse upang may pambili sila ng Covid test kit at hindi siya magbibigay ng deadline sa pagbabayad nito.
Kamakailan ay nagpasya ang PRC na itigil ang lahat ng swab testing na charged sa PhilHealth matapos na mabigo itong magbayad sa utang na P1.1 bilyon.
- Latest