Chinese, 4 Pinoy tugis sa ‘telco investment scam’
MANILA, Philippines — Isang Chinese national at apat na Pinoy ang tinutugis ng mga otoridad matapos masangkot ang mga ito sa umano’y “telecommunication scam”.
Kinilala ang mga ito na sina Neng Shen Sy, Chinese national; at mga Pinoy na sina Mark Glenn Sy; Felisa Sy; Stephen Sha; at Ronald Fesalbon na nagpakilalang mga may-ari at kinatawan ng Pil-Chi Telecoms Inc na may tanggapan sa Investment Center, Juan Luna St., Binondo, Maynila.
Ito ay kasunod nang pagpapalabas ng hold departure order at warrant of arrest ni Pasay City Regional Trial Court Presiding Judge Rowena Nieves Tan kaugnay sa kinakaharap na kasong syndicated estafa at walang kaukulang piyansa na inirekomenda ang korte para sa kanila.
Sa impormasyon, kinumbinsi ng mga suspek ang isa pang negosyanteng Chinese na tumanggi magpabanggit ng pangalan dahil sa isyu ng seguridad, na maglagak ng puhunan bilang investment sa kanilang telecommunication company.
Kasabay ng pangako na malaki ang magiging balik nito dahil sa sigurado na ang pagtanggap ng mga bagong telecommunication players ng Pilipinas na nais mapalakas ang internet connectivity.
Sa tiwala at kagustuhang makapagtayo ng telco sa Pilipinas ay nakumbinsi ito na maglagak ng kabuuang P100 milyon.
Ngunit makaraan ang ilang buwan, hindi na muling nakipagkita at nagparamdam sa kaniya ang mga suspek dahilan para magsampa siya ng kaso sa korte.
Mahigpit namang binabantayan ng Bureau of Immigration (BI) ang lahat ng posibleng lugar na maaaring gamitin ng mga ito upang makalabas ng bansa.
Nanawagan ang mga otoridad sa iba pang nabiktima ng mga suspek na maghain na rin ng kaso laban sa mga ito.
- Latest