5 frontliner sa EAMC, arestado sa droga

MANILA, Philippines — Naaresto ng mga otoridad ang limang frontliner ng East Avenue Medical Center (EAMC) nang makumpiskahan ng droga sa basement ng ospital, kamakalawa ng gabi sa Quezon City.

Ang mga suspek ay kinilalang sina Emmanuel Leongson, 45, nurse attendant; Guarso Hermino, 41,  garbage collector; James Daguian,  47,  janitor; Rowel Tina, morgue attendant; at Bonifacio Castillo,  37, morgue attendant.

Sa ulat, alas-10:00 ng gabi nang ikasa ng QCPD Kamuning Police Station 10 Drug Enforcement Unit ang buy-bust laban kay Leongson makaraang makakuha ng tip hinggil sa pagtutulak ng droga sa ospital at sa Brgy. Central.

Kasama ni Leongson sina Herminio at Daguian nang iabot ang shabu sa pulis na nagpanggap na buyer sa pasilyo ng ospital. Pagpasok naman sa quarters, huli naman sina Tina at Castillo na hinalang katatapos lang gumamit ng droga.

Nasamsam sa mga suspek ang pitong medium.size sachet ng shabu, at buy-bust money na P2,000; anim na improvised tooter na mat trace ng shabu; 1 aluminium foil; 5 disposable lighter at 2 digital weighing scale. Nakakulong na ang mga ito sa QCPD Station 10 at nahaharap sa kasong paglabag sa pag-iingat ng bawal na droga.