Manugang inutas ng biyenan

MANILA, Philippines — Dead-on-the-spot ang isang 36-anyos na lalaki matapos barilin ng kanyang biyenan na kanyang nakaalitan sa Barangay Rizaluna, Cordon sa lalawigang ito kamakalawa ng hapon.

Kinilala ng Cordon PNP ang nasawing biktima na si Dominador Tabangin habang ang suspek na bi­yenan nito ay nakilala naman na si Manolito Retotal, 65, magkapitbahay sa nasabing barangay.

Bago nangyari ang krimen, alas-5:20 ng hapon sa harap ng bahay ng biktima ay nagkaroon sila ng mainitang pagtatalo ng suspek sa hindi pa malamang kadahilanan hanggang sa pagbabarilin ng tatlong beses sa katawan na agad ikinamatay ng una.

Tumakas ang suspek, subalit naaresto rin makalipas ng ilang oras sa isinagawang follow-up operation.