Angkas sa motor na kaanak payagan

MANILA, Philippines — Hiniling sa Land Transportation Franchising and Regulatory Board (LTFRB) ng Lawyers for Commuters Safety and Protection (LCSP) na payagang umangkas ang asawa o kaanak sa motorsiklo sa mga lugar na ipinaiiral ang General Community Quarantine (GCQ).

Sinabi ni Atty. Ariel Inton,founding president ng LCSP, dapat payagan ng LTFRB na magka angkas ang magkapamilya sa motor dahil mas matipid ito, mas ligtas sa panahon na may banta pa ng COVID- 19 sa bansa.

Sinabi ni Inton na may 90 percent ng mga tao sa bansa ay may pagmamayari ng motor na ginagamit sa kabuhayan ng pamilya .

“Kung sabay pumasok ang mag-asawa sa trabaho ‘di ba’t mas ligtas si misis sa COVID-19 kung nakaangkas siya kay mister kaysa sasakay siya sa public transportasyon na hindi niya kakilala mga kasabay nya? Kung naka angkas siya kay mister ‘di bat mas matipid para sa pamilya dahil hindi na siya mamamasahe?.Pero wala silang social distancing na mag asawa? Aba at hindi ba sa bahay nila ay magkasama sila kumain, matulog, at iba pa? “,paliwanag ni Inton.

Anya, mas ligtas sa ­Covid-19 ang magka ang­kas na magkamag-anak sa motor kaysa sa sasakay sa pampasaherong sasakyan.

Sinabi din ni Inton na makakabawas rin ang mga ito sa mga nag-aagawan sa public transport dahil mas konti ang maisasakay dahil sa reduced capacity policy sa ngayon ng gobyerno para sa lahat ng passenger vehicles.