COVID-19 testing center ng PNP bubuksan na

MANILA, Philippines — Nakatakdang pasinayaan ano mang araw ngayong linggo ni Philippine National Police (PNP) chief, Gen. Archie Francisco Gamboa ang kanilang COVID-19 Testing Center na nabigyan na ng lisensiya na mag-operate.

Ayon kay Lt. Gen.  Camilo Pancratius Cascolan,  PNP Deputy Chief for Admi-nistration at commander ng Administrative Support to COVID-19 Operations Task Force (ASCOTF) noong Mayo 22 ay natanggap na nila ang “Licence to Operate” na inisyu ng Department of Health (DOH), 9 na araw makaraang matanggap nila ang sertipikasyon mula sa Reseach Institute for Tropical Medicine-DOH na nangangahulugan na pasado ang kanilang pasilidad para magsagawa ng RT-PCR (reverse transcription-polymerase chain reaction) tests sa mga infected na pulis sa COVID-19. 

Sinabi ni Cascolan na ang testing center ay pansamantang nasa loob ng PNP Crime Lab at sa mga susunod na panahon ay magtatayo ng permanenteng pasilidad na may sukat na 84 square meter sa likod ng gusali ng PNP Health Service. 

Sinabi rin ni Cascolan na uunahing i-test ang frontliner cops at tail enders para agad maagapan ang pagkakahawa-hawa. Posible ring buksan ang pasilidad sa mga sibilyan alinsunod sa gabay ng DOH. 

Nitong Mayo 22, umabot na sa 777 PNP personnel ang probable person under investigation (PUIs), 575 suspect PUIs, 263 confirmed,  102 ang nakarekober habang apat ang namatay.