PNP: Mahigit 93,000 lumabag sa ECQ

MANILA, Philippines — Inihayag ng pamunuan ng Philippine National Police (PNP) na simula March 17 hanggang April 7, 2020 ay umabot na sa 93,242 na katao ang nahuli dahil sa paglabag sa umiiral na enhanced community quarantine (ECQ).

Ayon kay Joint Task Force COVID-19 Shield commander Police Lieutenant General Guillermo Eleazar na sa nasabing bilang mahigit 63,000 ang binigyan lamang ng babala habang mahigit 30,000 naman ang inaresto at dinala sa presinto makaraang mahuli sa oras na umiiral ang curfew.

Sinabi ni Eleazar na ang parusa sa mga nahuli ay depende sa ordinansa ng nakasasakop na LGU at kahit may ECQ, tuloy ang inquest sa mga naaarestong lumabag sa curfew dahil mayroon nang online inquest. Pero, paalala ni Eleazar sa mga lalabag na kahit mayroong online inquest ay wala namang “online kulong” kaya diretso sila sa selda.