OFWs isama sa Bayanihan Act

MANILA, Philippines — Isama  ang mga naapektuhan o nawalan ng trabahong Overseas Filipino Workers (OFWs) sa social amelioration at adjustment program ng pamahalaan sa bagong batas na “Bayanihan to Heal As One Act”  bilang tugon sa krisis sa COVID-19.

Ito ang panawagan kahapon kay Pangulong Duterte ni Trade Union Congress of the Philippines (TUCP) President Raymond Mendoza dahil nag-aalala ang pamilya ng 169 OFWs na nagpositibo sa COVID-19 kung saan dalawa dito ay namatay na.

Sa ilalim ng Bayanihan to Heal As One Act, mabibiyayaan ng mula P5,000 hanggang P8,000 sa loob ng dalawang buwan ang nasa 18 milyong mga mahihirap na pamilya na naapektuhan ng krisis sa pamamagitan ng Department of Social Welfare and Development (DSWD) sa pinalawak na 4Ps.

Base sa tala ng DOLE, sinabi ni Mendoza na aabot sa 3,169 OFWs ang nawalan ng trabaho dulot ng epekto ng COVID-19  na inireport ng kagawaran noong Marso 23 na patuloy na nadaragdagan.