Drug bust sa Bulacan: 2 pusher todas
MANILA, Philippines — Dalawang drug pusher ang nasawi nang ito umano ay manlaban sa mga otoridad sa isang buy-bust operation sa Brgy. Bitungol, Norzagaray, Bulacan, kahapon ng madaling araw.
Kinilala ang dalawang napatay na suspek na sina Ace Gonzales, nasa hustong gulang, nakatira sa NHV, Brgy. Bitungol ng nasabing bayan at Richard Delara, 45.
Sa ulat, bago nangyari ang insidente, alas-3:30 ng madaling araw ay nagsagawa ng buy-bust operation ang mga pulis-Norzagaray sa nasabing lugar, subalit nakatunog umano ang dalawang suspek na pulis ang kanilang ka-deal.
Bumunot umano ang dalawang suspek ng baril at pinutukan ang ka-deal na pulis na masuwerteng hindi tinamaan.
Kung kaya gumanti na ng putok ang mga nakatagong pulis na siyang ikinamatay ng dalawang suspek.
Narekober sa pinangyarihan ang limang plastic sachet ng shabu, isang cal .38 revolver at buy-bust money.
- Latest
