Ex-Batangas solon, 2 pa sinunog sa sasakyan ,
MANILA, Philippines — Halos uling na nang makuha ang bangkay ng isang dating congressman sa lalawigan ng Batangas at dalawang kasama nito na kanyang driver at bodyguard nang barilin muna bago sunugin sa loob ng kanilang sasakyan, kahapon ng madaling araw sa Tiaong, Quezon.
Isa sa biktima ay kinilalang si dating 2nd District Representative Edgar Mendoza, 60, loob ng Honda Civic (DAN 6374). Habang inaalam pa ang pangalan ng kanyang driver at bodyguard nito.
Sa ulat ng Tiaong Municipal Police Station (MPS), ala-1:45 ng madaling araw nang makatawag sila ng tawag hinggil sa nasusunog na sasakyan sa kahabaan ng Barangay San Francisco.
Mabilis nagresponde ang mga operatiba ng Tiaong MPS kasama ang mga elemento ng Bureau of Fire Protection (BFP) at naapula ang apoy bandang alas-2:28 ng madaling araw at dito na nadiskubre ang bangkay ng dating solon at kasama nito na kapwa may mga tama ng bala sa iba’t ibang bahagi ng katawan.
Kinumpirma naman ni Atty. Edgar Mendoza Jr., anak ng dating mambabatas na sila ang nagmamay-ari ng sinunog na Honda Civic.
Base sa salaysay ng pamilya ni Mendoza, umalis ng kanilang bahay sa Batangas ang dating solon patungo ng Calamba, Laguna kasama ang driver at bodyguard para sa isang meeting nitong Miyerkules, subalit hindi na ito nakabalik pa ng kanilang bahay kaya iniulat ito ng kanyang asawa sa pulisya na nawawala.
Kasalukuyang nagsasagawa ng masusing imbestigasyon ang otoridad hinggil sa nasabing krimen at sa posibleng pagkakakilanlan ng mga suspek at kung ano ang motibo ng mga ito.
- Latest