Martial law sa Mindanao, tapos na
MANILA, Philippines — Kahit pormal nang nagwakas ang martial law nitong Disyembre 31, 2019 sa rehiyon ng Mindanao ay ipagpapatuloy pa rin ng tropa ng militar ang pagbabantay sa nakamit na kapayapaan sa rehiyon.
Ito ang inihayag kahapon Defense Secretary Delfin Lorenzana pagkaraang mapagdesisyunan ng gobyerno na huwag ng palawigin pa ang martial law sa buong Mindanao Region.
Pinasalamatan naman ni Lorenzana ang netizens partikular na ang mga residente ng rehiyon sa pagsuporta sa idineklarang martial law ni Pangulong Rodrigo Duterte upang masupil ang terorismo sa nangyaring Marawi City siege noong Nobyembre 23, 2017.
Ang martial law sa buong rehiyon ng Mindanao ay pormal na nagwakas nitong hatinggabi ng Disyembre 31, 2019 pagkalipas ng dalawang taon, pitong buwan o kabuuang 953 araw ng pagiging epektibo nito.
Unang idineklara ni Pangulong Rodrigo Duterte ang martial law noong Mayo 23, 2017 matapos umatake at maghasik ng terorismo ang Maute-Islamic State of Iraq and Syria (ISIS) sa Marawi City sa hangaring magtatag ng caliphate ng mga terorista sa rehiyon. Ang caliphate ay isang kaharian ng mga Muslim na ipinakikipagpatayan ang mga bumubuo sa ISIS.
Napalawig ang martial law mula Hulyo 24 hanggang Disyembre 2017 habang dalawang beses pa itong pinalawig sa tulong ng Kongreso sa buong taon ng 2018 at 2019.
- Latest
