727 parak nasa drug list ng PNP
MANILA, Philippines — Kaugnay ng puspusang internal cleansing ng pamunuan ng Philippine National Police (PNP) ay naitala nila sa kanilang hanay ang 727 nilang miyembro ang nasa drug watchlist.
Ang nasabing bilang ng mga pulis ay lulong, sangkot, at protektor ng illegal drug trade sa bansa.
Ito ang inihayag kahapon ni PNP Chief Police General Oscar Albayalde kaugnay ng puspusang surveillance operation sa mga parak na naliligaw ng landas.
Bukod sa listahan ng PNP ay nasa listahan din ng Pangulong Rodrigo ang 391 mga aktibong pulis na sangkot din sa ilegal na droga.
Inihayag din ni Albayalde na aabot naman sa 200 mga tiwaling pulis ang nasakote ng PNP-Integrity Monitoring Group (PNP-IMEG) na sangkot sa iba’t ibang ilegal na aktibidades.
Ayon pa sa PNP Chief, kung siya ang masusunod ay ayaw na niyang makabalik pa sa serbisyo ang mga nag-AWOL (Absense Without Official Leave) na mga pulis na umaapela sa Regional Appellate Board ng National Police Commission (NAPOLCOM).
Ang NAPOLCOM ang nagdedesisyon na pabalikin ang naturang mga pulis dahil sa mga teknikalidad at walang magagawa ang PNP kundi sundin ang NAPOLCOM kahit nabaliktad ang kanilang desisyon.
Kaya sinisiguro ngayon ng PNP na nasusunod ang “due process” sa pagtatanggal ng mga tiwaling pulis para hindi na makabalik ang mga ito sa serbisyo.
- Latest